Qamar Jalalvi Biography | Urdu Ghazal Poet (1887–1968)

ققمر جلالوی (1887–1968)

قمر جلالوی (اردو: قمَر جلالوی)، جن کا اصل نام محمد حسین تھا، اردو کے معروف شاعر، ادیب اور غزل گو تھے۔ انہیں استاد قمر جلالوی کے نام سے بھی جانا جاتا ہے۔

ابتدائی زندگی

قمر جلالوی 1887 میں بھارت کے شہر علی گڑھ کے قریب جلالی میں پیدا ہوئے۔ تقسیمِ ہند کے بعد 1947 میں وہ پاکستان ہجرت کر کے کراچی میں آباد ہو گئے۔ ان کا انتقال 4 اکتوبر 1968 کو کراچی میں ہوا۔

Read My Beautiful Ghazal Nawazishon k mosam click here

ادبی زندگی

قمر جلالوی کو کلاسیکی اردو غزل کے بہترین شعراء میں شمار کیا جاتا ہے۔ ان کی شاعری میں سادگی، روانی اور جذبات کی گہرائی نمایاں ہے۔

انہوں نے محض آٹھ سال کی عمر میں شاعری شروع کر دی تھی، اور بیس سال کی عمر تک ان کا کلام خاصا مقبول ہو چکا تھا۔

زندگی کے ابتدائی ایام میں انہوں نے مالی مشکلات کا سامنا کیا اور سائیکل مرمت کی دکانوں پر کام کیا۔ اسی وجہ سے انہیں ابتدا میں "استاد" کہا جانے لگا، کیونکہ برصغیر میں ہنر مند افراد کو استاد کہا جاتا ہے۔ بعد ازاں جب ان کی شاعری کو شہرت ملی تو ناقدین نے بھی انہیں استاد قمر جلالوی کے نام سے پکارنا شروع کر دیا۔

Adab Ki Poetry

وفات

استاد قمر جلالوی کا انتقال 4 اکتوبر 1968 کو کراچی، پاکستان میں ہوا۔ وہ اردو ادب میں اپنی لازوال غزلوں کے باعث آج بھی یاد کیے جاتے ہیں۔

کتب

ان کے شعری مجموعوں میں درج ذیل کتب شامل ہیں:

• رشکِ قمر (Rashk-e Qamar)
• اوجِ قمر (Auj-e Qamar)
• تجلّیاتِ قمر (Tajalliyat-e Qamar)
• غمِ جاوداں (Gham-e-Javedan)
• آئے ہیں وہ مزار پہ (Aaye Hain Woh Mazaar Pe)
• دبا کے قبر میں سب چل دیے (Daba Ke Qabr Mein Sab Chal Diye)

ایک دلچسپ واقعہ

ایک بار استاد قمر جلالوی کی ہم عصر شاعرہ وحیدہ نسیم صاحبہ (جو غربت کی وجہ سے استاد کو کسی حد تک کم تر سمجھتی تھیں) نے طنزاً استاد سے کہا کہ قمر شاعر تو میں
تمھیں تب مانوں جب تم مشاعرے میں ایک ہی شعر پڑھو اور محفل لوٹ لو
استاد قمر نے چیلنج قبول کر لیا۔۔۔
کچھ ہی دنوں بعد ایک مشاعرہ ہوا س میں یہ دونوں بھی مدعو تھے۔ وحیدہ نسیم اگلی صفوں میں بیٹھی تھیں۔۔۔
استاد کی باری آئی تو استاد نے مائیک پر کہا:
" خواتین و حضرات آج کسی کے چیلنج پر صرف ایک ہی شعر پڑھوں گا آگے فیصلہ آپ لوگوں پر ہے۔۔۔
یہ کہہ کر استاد نے پہلا مصرع پڑھا
پچھتا رہا ہوں نبض دکھا کر حکیم کو
بڑی واہ وا ہوئی.۔۔
استاد نے پہلا مصرع مکرر کیا لوگوں نے کہا
پھر کیا، کیا ہوا استاد۔۔۔آگے تو بتائیے
اب استاد قمر نے مکمل شعر پڑھا
پچھتا رہا ہوں نبـض دکھا کر حکـیم کو،،،
نسخے میں لکھ دیا ہے وحیدہ نسیم کو 🙃
محفل میں دس منٹ تک تالیاں بجتی رہیں اور قہقہے لگتے رہے۔۔

جب کچھ شور کم ہوا تو بے ساختہ لوگوں کی نظریں وحیدہ نسیم کی طرف گئیں مگر وہ تو جانے کب کی غائب ہو چکی تھیں 🤪

Read My Poem MAAN KI YAAD Click here

غزل

قمر جلالوی

کبھی کہا نہ کسی سے ترے فسانے کو
نہ جانے کیسے خبر ہو گئی زمانے کو

دعا بہار کی مانگی تو اتنے پھول کھلے
کہیں جگہ نہ رہی میرے آشیانے کو

مری لحد پہ پتنگوں کا خون ہوتا ہے
حضور شمع نہ لایا کریں جلانے کو

سنا ہے غیر کی محفل میں تم نہ جاؤ گے
کہو تو آج سجا لوں غریب خانے کو

دبا کے قبر میں سب چل دیے دعا نہ سلام
ذرا سی دیر میں کیا ہو گیا زمانے کو

اب آگے اس میں تمہارا بھی نام آئے گا
جو حکم ہو تو یہیں چھوڑ دوں فسانے کو

'قمر' ذرا بھی نہیں تم کو خوفِ رسوائی
چلے ہو چاندنی شب میں انہیں بلانے کو

Read My Naat Mitae Duniya qaleel Aqa Click here

---

غزل

قمر جلالوی

مریضِ محبت انہی کا فسانہ سناتا رہا دم نکلتے نکلتے
مگر ذکر شامِ الم کا جب آیا چراغِ سحر بجھ گیا جلتے جلتے

انہیں خط میں لکھا تھا دل مضطرب ہے جواب ان کا آیا محبت نہ کرتے
تمہیں دل لگانے کو کس نے کہا تھا بہل جائے گا دل بہلتے بہلتے

مجھے اپنے دل کی تو پروا نہیں ہے مگر ڈر رہا ہوں کہ بچپن کی ضد ہے
کہیں پائے نازک میں موچ آ نہ جائے دلِ سخت جاں کو مسلتے مسلتے

بھلا کوئی وعدہ خلافی کی حد ہے حساب اپنے دل میں لگا کر تو سوچو
قیامت کا دن آ گیا رفتہ رفتہ ملاقات کا دن بدلتے بدلتے

ارادہ تھا ترکِ محبت کا لیکن فریبِ تبسم میں پھر آ گئے ہم
ابھی کھا کے ٹھوکر سنبھلنے نہ پائے کہ پھر کھائی ٹھوکر سنبھلتے سنبھلتے

بس اب صبر کر رہروِ راہِ الفت کہ تیرے مقدر میں منزل نہیں ہے
ادھر سامنے سر پہ شام آ رہی ہے ادھر تھک گئے پاؤں بھی چلتے چلتے

وہ مہمان میرے ہوئے بھی تو کب تک ہوئی شمع گل اور نہ ڈوبے ستارے
'قمر' اس قدر ان کو جلدی تھی گھر کی کہ گھر چل دیے چاندنی ڈھلتے ڈھلتے

Read My Ghazal Damn mera pabnd e wafa Click here

---

غزل

قمر جلالوی

کب مرا نشیمن اہلِ چمن گلشن میں گوارا کرتے ہیں
غنچے اپنی آوازوں میں بجلی کو پکارا کرتے ہیں

اب نزع کا عالم ہے مجھ پر تم اپنی محبت واپس لو
جب کشتی ڈوبنے لگتی ہے تو بوجھ اتارا کرتے ہیں

جاتی ہوئی میت دیکھ کے بھی واللہ تم اٹھ کے آ نہ سکے
دو چار قدم تو دشمن بھی تکلیف گوارا کرتے ہیں

بے وجہ نہ جانے کیوں ضد ہے ان کو شبِ فرقت والوں سے
وہ رات بڑھا دینے کے لیے گیسو کو سنوارا کرتے ہیں

پونچھو نہ عرق رخساروں سے رنگینیٔ حسن کو بڑھنے دو
سنتے ہیں کہ شبنم کے قطرے پھولوں کو نکھارا کرتے ہیں

کچھ حسن و عشق میں فرق نہیں ہے بھی تو فقط رسوائی کا
تم ہو کہ گوارا کر نہ سکے ہم ہیں کہ گوارا کرتے ہیں

تاروں کی بہاروں میں بھی 'قمر' تم افسردہ سے رہتے ہو
پھولوں کو تو دیکھو کانٹوں میں ہنس ہنس کے گزارا کرتے ہیں

Read My Ghazal YUN UMER HO TMAM TAMNA NHI RAHI click here

---

غزل

قمر جلالوی

سجدے تیرے کہنے سے میں کر لوں بھی تو کیا ہو
تو اے بتِ کافر نہ خدا ہے نہ خدا ہو

غنچے کے چٹکنے پہ نہ گلشن میں خفا ہو
ممکن ہے کسی ٹوٹے ہوئے دل کی صدا ہو

کھا اس کی قسم جو نہ تجھے دیکھ چکا ہو
تیرے تو فرشتوں سے بھی وعدہ نہ وفا ہو

انساں کسی فطرت پہ تو قائم ہو کم از کم
اچھا ہو تو اچھا ہو برا ہو تو برا ہو

اس حشر میں کچھ داد نہ فریاد کسی کی
جو حشر کہ ظالم ترے کوچے سے اٹھا ہو

اترا کے یہ رفتارِ جوانی نہیں اچھی
چال ایسی چلا کرتے ہیں جیسی کہ ہوا ہو

مے خانے میں جب ہم سے فقیروں کو نہ پوچھا
یہ کہتے ہوئے چل دیے ساقی کا بھلا ہو

اللہ رے او دشمنِ اظہارِ محبت
وہ درد دیا ہے جو کسی سے نہ دوا ہو

تنہا وہ مری قبر پہ ہیں چاک گریباں
جیسے کسی صحرا میں کوئی پھول کھلا ہو

منصور سے کہتی ہے یہی دارِ محبت
اس کی یہ سزا ہے جو گناہ گارِ وفا ہو

جب لطف ہو اللہ ستم والوں سے پوچھے
تو یاس کی نظروں سے مجھے دیکھ رہا ہو

فرماتے ہیں وہ سن کے شبِ غم کی شکایت
کس نے یہ کہا تھا کہ 'قمر' تم ہمیں چاہو

Watch My Ghazal Karra Tha Bojh

🎥 If you enjoy my poetry and literary content, don’t miss out on my YouTube channel! Click the button below to watch, subscribe, and stay updated with my latest videos.

👉 Watch & Subscribe to Afzal Shakeel Sandhu
The opinions and comments of friends will be respected.

Written by: Afzal Shakeel Sandhu